Camiño ao respecto. Grazas por participar!

Na útima semana de novembro varias familias do Anxo unístesvos a esta iniciativa e xunto co resto de participantes en toda Galicia conseguemos sumar 43.875 quilómetros para amosar o noso apoio á loita contra a violencia de xénero. Aquí queda un pequeno recordo das vosas andainas. Moitas grazas por participar en familia!

Collage Camiño ao Respecto 25N

Noraboa a todos os participantes!

 Esta semana reamatou o I Torneo de Peón do Anxo da Garda. Participaron case 30 alumnos/as de 3º a 6º de Primaria demostrando a súa habilidade no lanzamento deste xoguete popular. Aqueles que conseguiron bailar o trompo durante máis tempo obtiveron algún pequeno agasallo como recompensa. Deixámosvos algunhas fotos nos patios e da entrega de premios.

Andaina contra a violencia de xénero

Durante esta semana a Xunta de Galicia organiza a VIII Andaina contra a Violencia de Xénero  (facede clic para máis información) para amosar o apoio a esta causa. Ante a imposibilidade de xuntarse para realizar dita andaina como noutras edicións, as condicións de realización da mesma cambian este ano. O cole inscribiuse como entidade neste evento no que cada familia que decida participar (ou varios membros da mesma) tratará de completar os 5 km que tería o percorrido da andaina en circunstancias normais. Estes 5 km poderán ser completados ao longo desta semana, ata o 30 de novembro. A distancia é orientativa, poden ser menos ou máis quilómetros, xa que o importante é amosar o apoio a esta causa e pasar un rato en familia facendo un pouco de actividade física. 

Como xa dixemos, podedes escoller calquera día desta semana para participar (a ver se temos sorte e acompaña o tempo...) e tedes a opción de imprimir os dorsais para que se recoñeza o noso apoio a esta loita. Para o noso cole foron asignados números entre 4913 e 5092. Podedes escoller o que queirades e incluso o mesmo para toda a familia. Aquí tedes o enlace para imprimilos (se non podedes imprimir, podedes copiar o modelo a man na metade dun folio e colocalo con imperdibles igualmente):

DESCARGA AQUÍ OS TEUS DORSAIS 

Recordade que se trata dunha actividade a realizar soamente en familia para cumplir así coas normas e restricións impostas dentro do noso concello por mor do COVID19.

Por último, se vos apetece, podedes enviar unha foto como recordatorio da vosa participación na andaina (non teñen porque saír as caras) e con todas as que recibamos faremos unha presentación ou collage que colgaremos nesta entrada do blog. As fotos podedes envialas á dirección de correo: edufanxo@gmail.com 

Animádevos a participar!!

Torneo de Peón: "Polo San Martiño, peóns ao camiño!"

A pesar das limitacións que supón a actual situación causada pola COVID19 durante este curso intentaremos dar continuade aos recreos activos e para todos/as que comezamos a organizar o curso pasado. Deste xeito, no primeiro torneo que imos a organizar optaremos por un xoguete tradicional, de uso individual e que cumpre con todas as normas de seguridade e hixiene. A organización e normas están recollidas no seguinte cartel do que deixaremos unaha copia en tódalas clases. Ánimo e apuntádevos!

Plan Proxecta

 Nesta lapela aparecerán todas as entradas con información relativa a actividades creadas dentro do Plan Proxecta.

Benvidos ao curso 2020-2021!

Desde a área de Educación Física queremos darvos a benvida a este novo curso que sen dúbida será distinto a tódolos demais. O noso obxectivo é tentar que os vosos fillos e fillas poidan desfrutar ao máximo as sesións de EF para o que resultará fundamental o cumprimento dunha serie de normas de seguridade e organización. Todas estas normas están recollidas no Plan de Adaptación COVID elaborado polo centro e que está dispoñible para a súa consulta na páxina web do colexio. Aquí deixamos unha pequena infografía (seguindo o modelo creado pola mestra de EF @natalialogrono) a modo de resumo cos aspectos máis importantes a ter en conta.

En principio, como se indica neste resumo, todos os nenos e nenas deben traer a bolsa de aseo ao igual que facían o curso pasado. Tendo o conta o protocolo para o uso dos aseos (3 nenos como máximo ao mesmo tempo), a modificación da última sesión do horario e o número de alumnos en cada grupo, este aseo non sempre se poderá realizar ao remate das sesións. Priorizaremos as normas establecidas no protocolo e o aproveitamento do tempo de práctica. 

Destacamos que ademais da bolsa de aseo propia de EF o alumnado terá que ter consigo tamén a funda da máscara e botella de auga solicitada nas normas xerais do colexio.

Normas e funcionamiento EF de Gerar Parrado

Feliz e activo verán!

Chegamos ao fin deste estraño curso cun vídeo que recolle os vosos traballos na actividade PaseArte realizada de forma conxunta coa mestra Andrea. Algúns de vós preguntachedes polo vídeo da anterior actividade de expresión corporal. Dicirvos que por algúns problemas técnicos que tiven a semana pasada resultoume imposible montar ese vídeo. Mándovos as miñas desculpas.
Antes de deixar este último vídeo, soamente dicirvos que espero que desfrutasedes das actividades de EF e que teño moitas ganas de que nos volvamos a ver en setembro no cole nas clases de EF. Espero que pasedes un activo e saudable verán! Un saúdo e unha aperta moi grande para todos e todas!

PaseArte

Para esta última proposta do curso feita de forma conxunta desde o área E. Física e E. Artística tomamos como referente a actividade "Bike and Paint" do mestre do de EF David Cañada. Trátase dunha actividade que pretende fomentar a mobilidade activa ao tempo que desenvolvemos a nosa creatividade e competencia artística.

En que consiste PaseArte?

Consiste en realizar un debuxo sobre o mapa do teu barrio ou doutros barrios de Coruña mentres te moves camiñando, correndo, en patinete, bicicleta... Para iso non usarás papel e lapis, senón que faras o teu debuxo coa axuda dalgunha App para o móbil (que comentaremos máis abaixo) dalgún familiar adulto. Este é un exemplo do resultado que se podería obter:

Instrucións a seguir

1. Antes do paseo sería recomendable utilizar un plano de Coruña ou do teu barrio para planificar o percorrido que debes facer para conseguir o debuxo que te propoñas. Observa as rúas polas que tes que ir, cambios de dirección... Podes aproveitar ademais para repasar o vocabulario en inglés sobre a cidade: https://musicoresblog.wordpress.com/2020/06/07/english-vocabulary-the-city/ 

2. O adulto que te acompañe debe descargar no móbil unha aplicación gratuita das que se usan normalmente para rexistrar adestramentos correndo ou en bicicleta: Endomondo, Strava, Runtastic ou calquera outra que coñezades que a través do GPS vos facilite a ruta realizada ao rematar o percorrido.

3. Para realizar o paseo debes ir a pé, camiñando ou correndo, ou empregar un medio de transporte activo: patinete (eléctrico non vale), patíns ou bicicleta por exemplo.

4. O debuxo será realizado nun so paseo. Non vale sumar varios paseos en distintos días. Podes parar durante o paseo cando o necesites e podes facer varios paseos se o resultado non é o esperado ou se queres enviar varios debuxos.

5. Respeta tódalas normas de circulación durante o teu paseo e ten precacución se tes que consultar o móbil durante o mesmo. A mellor opción é parar, consultar o móbil para seguir pola ruta desexada, e continuar.

6. Cando remates o paseo facede unha captura de pantalla no móbil onde se vexa o traxecto realizado e polo tanto a vosa "obra de arte".

7. Enviade esa imaxe coa captura de pantalla aos correos edufanxo@gmail.com e andreamusica1617@gmail.com para que tanto a mestra Andrea, na parte artística, coma eu, na parte de esforzo e actividade física, valoremos o voso traballo. Ademais tamén podedes enviar un "selfie" ou foto onde se aprecie en que medio de transporte e con quen realizachedes o paseo. No ASUNTO do correo indicade PASEARTE NOME e CURSO. A data límite para enviar os vosos traballos é o martes 16 de xuño.

CONSELLOS PRÁCTICOS

- Non hai un mínimo de distancia pero canto máis largo sexa o paseo e as liñas máis longas, máis sinxelo será apreciar o debuxo que realizades.

- Podedes debuxar o que queirades pero en caso de dúbida é preferible optar por figuras máis simples e fácilmente recoñecibles.

- É moi importante preparar o debuxo previamente na casa sobre un plano para despois ter claro cal é a ruta a seguir.

Finalmente, aquí vos deixamos outros resultados, por si vos serven de inspiración, compartidos en Twitter polo mestre @MiguelCambro tras realizar unha actividade moi similar a esta co seu alumnado de Primaria:

Actividades de Ritmo e Expresión Corporal

Pasamos a traballar un novo contido de Educación Física: Expresión Corporal e Ritmo. Desta vez tedes a posibilidade de elixir entre 3 tipos de actividades distintas que se describen a continuación. Podedes facer unha actividade, dúa ou tres. O que vos apeteza. Como xa sabedes podedes mandar o resultado dos vosos traballos ao correo edufanxo@gmail.com. 
O último día para enviar os traballos é o martes 2 de xuño.

ACTIVIDADE 1: REPRESENTA UN CADRO OU ESCULTURA

Trátase dunha actividade que se puxo de moda durante a cuarentena. En primeiro lugar tedes que escoller un cadro (ou escultura) coñecido. Utilizade as cousas que teñades na casa, botádelle imaxinación e non dubidedes en pedir axuda á familia se é necesario. Colocade todo o que necesitedes, posade e facede un ha fotografía para ver o resultado.

Se queredes podedes enviar dita fotografía do VOSO CADRO e outra DO CADRO ORIXINAL ou ben o NOME DO CADRO E AUTOR.

No ASUNTO do correo debedes escribir CADRO e o VOSO NOME E CURSO.

Aquí tedes un exemplo do cadro Muchacha en la ventana de Salvador Dalí publicada no xornal Faro de Vigo:

ACTIVIDADE 2: COREOGRAFÍA (MELLOR EN FAMILIA)

Escolle unha coreografía ou baile sinxelo que dure entre 1 e 2 minutos. Se pode ser con algún ou tódolos membros da familia, moito mellor. Ensaia e cando teñas os pasos aprendidos envía un mail co teu vídeo. Engade no mail o nome da canción ou cancións que bailes e o seu intérprete. Recorda,a máxima duración do vídeo será de arredor 2 minutos. 

A coreografía é libre pero aquí tes algunhas suxerencias e exemplos por se te resultan útiles:

- "Animarius": coreografías sinxelas e de diversos temas de arredor dun minuto de duración.

- "Just Dance Kids": coreografías de tódolos tipos e para distintas idades cunha duración aproximada de 2 minutos.

- "Kidz Bop". grupo xuvenil con coreografías de temas actuais aínda que con algo máis de dificultade.

- "Everybody": coreografía sinxela do clásico tema do grupo Take That.

- "Sofía": divertida coreografía do tema de Álvaro Soler.

- "Can´t stop the feeling": coreografía deste tema que forma parte da banda sonora da película Trolls.

- "Tik Tok": supoño que moitos de vós, especialmente os máis maiores, coñecedes esta aplicación. Se queredes podedes escoller algunha das coreografías que nela se propoñen.

Envía o vídeo co resultado da coreografía (recorda que se é en familia, moito mellor) indicando no ASUNTO do correo COREO e o teu NOME E CURSO.

ACTIVIDADE 3: EMOJIS

Escolle un emoji. Intenta imitar este emoticono usando só os teus xestos e, se é necesario, as túas mans. Podedes usar complementos se é necesario: gafas, sombreiros...

Envía un correo coa túa fotografía e tamén coa imaxe do emoji escollido No ASUNTO indica EMOJI e o teu NOME e CURSO.

Aquí tes un exemplo:

Fonte orixinal da foto: https://www.lifeboxset.com/

A idea para esta actividade xurde dunha proposta da mestra Josune Fernández Negro.

Por último decirvos que se algún de vós quere facer algunha das actividades pero non desexa enviar foto ou vídeo, podedes esccribir un correo no que contedes que vos pareceu a actividade e porque escollichedes dita actividade.

Celebración e montaxe das Letras Galegas

Moitas grazas a todos e todas polas vosas aportacións feitas trala visita á nosa Feira das Letras Galegas. Con elas fixemos esta montaxe para que poidades ver as ideas aportadas por tódolos compañeiros e compañeiras. En primeiro lugar aparecen as vosas "fichas" e fotos con información sobre xogos populares. A continuación o resultado da elaboración dos vosos xoguetes tradicionais. En terceiro lugar fotos e vídeos coa creación dos vosos instrumentos. Continúa o vídeo con obras de artesanía tradicional de tódolos tipos e para tódolos gustos . E para rematar recomendámosvos que non deixedes de ver a muiñeira colectiva creada gracias á participación de varios de vós.
Se vedes que hai algún erro ou falta algunha das vosas aportacións podedes indicalo deixando un comentario nesta entrada ou enviando un correo a edufanxo@gmail.com

ACTUALIZACIÓN DO VÍDEO: tralos correos recibidos actualizamos o vídeo incluíndo (na parte de xogos, xoguetes e muiñeira) a algúns de vós  que por despiste e "problemas técnicos" non aparecíades antes. Ademais agora podedes escoitar o son dos instrumentos que creachedes. Desculpade as molestias e agora si que penso que estamos todos e todas.

Feira das Letras Galegas

O 17  de maio celebramos o Día das Letras Galegas e este ano intentaremos desfrutar del  desde casa. Invítamosvos a participar nunha Feira Virtual onde podedes visitar distintos "postos" ou "talleres"  sobre cultura tradicional galega con actividades de Música, Plástica, Biblioteca ou Ed. Física.
En primeiro lugar facede unha visita a todos os "talleres" para leer a información que vos ofrecen. Dentro de cada "taller" hai unha tarefa coas instrucións pala levala a cabo. Debedes escoller, polo menos, dúas tarefas (se queredes podedes facer máis). Unha tarefa ten que ser de Plástica ou Música e a outra debe ser de E. Física. Relizádeas tal e como se explica e enviádeas á dirección de correo que se indica en cada unha delas. Ollo que o correo pode ser para a mestra Andrea ou o mestre Gerardo, fixádevos ben. Por último non olvidedes incluir o ASUNTO que se indica nas instrucións e o VOSO NOME E CURSO. O último día para enviar os traballos será o sábado 16 de maio as 14:00 h. Se tedes algunha dúbida sobre as tarefas de EF podedes escribir a edufanxo@gmail.com ou deixar un comentario nesta entrada. Esperemos que vos guste a actividade!

Programa "Movete Connosco"

Compartimos un proxecto lanzado desde a Xunta de Galicia para promover a actividade física durante este período de confinamento. 

O sedentarismo é unha pandemia cuxos efectos se incrementan nestes tempos de confinamento. 

A actividade física e as técnicas de relaxación poden ser ferramentas útiles para axudar a manter a calma e seguir protexendo a saúde durante o tempo de confinamento.

Por iso é fundamental que, nas idades máis temperás onde se adquiren os hábitos, o noso alumnado continúe con rutinas de traballo físico que incidan sobre os compoñentes da condición física para a saúde (Resistencia  Cardio-respiratoria, Forza-resistencia muscular, flexibilidade e composición corporal), combinadas coas habilidades  motrices e  coordinativas.

Perante esta situación, a Dirección xeral de Educación, Formación Profesional e Innovación Educativa, a través dun grupo de especialistas en educación física e das súas familias deseñou unha programación semanal que permite ao alumnado traballar algúns destes aspectos.

Estes vídeos constan dunha serie de actividades físicas cunha duración de 15 minutos aproximadamente, deseñadas para ser desenvoltas na casa, sen apenas material específico e dunha maneira sinxela, divertida e significativa para o alumnado de educación primaria.

Na situación actual, o exercicio físico debe ser un dos maiores aliados para combater a tensión e a frustración dos e das pequenas. A idea é facelo sempre a través do lúdico e o xogo. Que aprendan xogando e xerarlles estímulo.

Libro de Merendas Saudables do Anxo

Grazas a vosa colaboración xa podemos desfrutar do "Libro de Merendas Saudables do Anxo". Nel podedes atopar máis de 40 ideas para facer as vosas merendas máis deliciosas e saudables. Se desde o índice queredes ir directamente a o tipo de merenda que máis vos interese só tedes que facer clic ou pulsar sobre ese tipo de merenda. Se vedes que hai algún erro ou falta algunha receita podedes facer un comentario nesta entrada e intentarei solucionalo. Espero que vos guste e sexa útil!

Podedes velo neste enlace en formato revista:

"Revista Merendas Saudables do Anxo"

Ou aquí abaixo en forma de documento.

Libro Merendas Anxo 3 by Gerar Parrado on Scribd

DEFC no Anxo da Garda

Como ben sabedes o pasado 28 de abril celebrouse o Día da EF na Casa (inicialmente Día da EF na Rúa) e algúns de vos decidichedes participar enviando unha foto na que desedes a coñecer algunhas das aprendizaxes que se poden adquirir nas clases de EF. Aquí queda un collage e unha pequena montaxe con esas fotos que tamén enviaremos ao COLEF (Colexio de EF) de Galicia para que teñan constancia da nosa participación na conmemoración deste día.
Algúns de vós enviachedes vídeos que non se incluiron xa que a montaxe tiñamos que facela exclusivamente con fotografías. Moitas grazas de todas formas pola vosa colaboración.

Actividades para Educación Infantil

Deixovos unha proposta con multitude de actividades pensadas específicamente para nenos de entre 3 e 6 anos. Este traballo foi relizado por estudiantes da Universidad Complutense de Madrid e organízase de forma similar a como traballamos a Psicomotricidade no cole. Hay distintas opcións; traballo por circuítos, traballo por rincóns, contos motores e xogos.
Se queredes botar un vistazo veredes que as actividades son sinxelas de levar a cabo e realmente adaptadas ao máis pequenos. Espero que vos resulten útiles! Só tedes que pulsar na imaxe:

Día da Educación Física na Casa

O martes 28 de abril estaba previsto celebrar o "Día da Educación Física na Rúa" en toda España. Trátase dunha actividade na que o noso cole estaba inscrito e que está pensada para dar visibilidade á E. Física e valorar a importancia que esta área debe ter dentro do sistema educativo. Obviamente non se poderá celebrar como se viña facendo nos últimos anos polo que os distintos Colexios de EF (COLEF) de tódalas comunidades autónomas ofrecen unha alternativa para convertir esta celebración no "Día da EF na Casa". Esta alternativa consiste no seguinte:

1) Hoxe luns 27 de abril ou mañá pola mañá, se o desexades, podedes enviar unha FOTO vosa realizando algunha actividade propia das clases de EF: correndo, facendo unha voltereta, roda lateral, "pino", botando unha pelota, conducindo unha pelota co pé, facendo un lanzamento a canastra, bailando... en fin, o que se vos ocurra. Pode sair toda a familia!
Se podedes (non é obrigatorio) mostrade (nun folio) a imaxe oficial do #DEFC2020 que é esta:

Debedes enviar a foto á conta de correo de EF mencionada no aviso de Abalar indicando no asunto DEFC2020.
Con esas fotos, se temos suficientes, faremos un mosaico que ademais de colgar no blogue e páxina web do colexio enviaremos ao COLEF Galicia para que saiban da nosa participación nesta iniciativa. Tendo en conta este último aspecto, se preferides que aos vosos fillos e fillas non se lles vexa a cara, podedes sacar unha foto de costas por exemplo.

Ademais se os pais e nais, de forma particular, queredes subir a foto nas vosas redes sociais (Twitter, Instagram, Facebook...)  podedes facelo incluindo o hashtag #DEFC2020 e facendo mención ao CEIPP Anxo da Garda no texto.

Por último dicirvos que tamén como parte da celebración deste día poderedes desfrutar dunha clase on line de EF orientada a Primaria a cargo da mestra Josune Rodríguez-Negro. A partir das 10:00 da mañá do martes 28 na canle de Youtube do Consello COLEF

Concurso de Merendas Saudables

Ola familias! Como xa sabedes, ao principio deste curso comezamos as Merendas Saudables durante os nosos recreos. Tratouse dunha iniciativa na que a inmensa maioría vos involucrachedes desde o principio e que continuaremos cando poidamos voltar ao cole. Para non perder este bo hábito imos propoñer un sinxelo concurso. Trátase dun Concurso de Merendas Saudables para consumir ben pola mañá ou a media tarde. 

 En que consiste?

Debedes pensar nunha receita sinxela para elaborar unha merenda o máis saudable posible. Podedes optar por seguir o calendario que tiñamos no cole e elixir entre elaborar un bocadillo, merenda con froita ou lácteos ou incluír tamén outros ingredientes: froitos secos, cereais (mellor integrais)...

Trataremos de evitar produtos procesados ou moi azucrados na elaboración (chocolate, "nutella", embutidos moi procesados, postres lácteos...) e optar por ingredientes "naturais" e produtos frescos na medida do posible.

Como elaborar e redactar a vosa receita?

Para que todos poidamos aprender a elaborar a vosa merenda saudable debedes de recoller o proceso de elaboración da vosa receita por escrito xunto cunha foto da mesma e enviala ao correo que se facilitou a través do aviso de Abalar. Tedes tres opcións: 

1) Elaborar un documento de Word onde se inclúa unha foto da receita explicando como se elabora a vosa merenda: nome da receita, ingredientes, tempo de preparación e instrucións para elaborar a receita e enviar un mail onde se achegue dito documento

Se queredes podedes seguir este modelo.

Receita Galletas Avea e Plá... by Gerar Parrado on Scribd

2) Facer un documento similar a este pero a man (boli,lapis) e sacar unha foto que enviaredes achegándoa a un mail.

3) Escribir un correo onde se inclúa, no propio correo: nome da receita, ingredientes, tempo de preparación, instrucións para elaborar a merenda. Ademáis, se podedes, tamén podedes achegar unha foto da receita.

Se necesitades ideas podedes consultar os enlaces na columna dereita do blogue: MERENDAS SAUDABLES.
Se enviades suficientes receitas, intentaremos facer un libro dixital para que todos poidades coñecer as receitas elaboradas polos vosos compañeiros e compañeiras.

IMPORTANTE: No asunto do correo debedes de escribir 
MERENDA - NOME DO ALUMNO/A - CURSO

Máis opcións para estar activos na casa

Seguides coas vosas rutinas e xogos para estar activos? Xa levamos varias semanas e ao mellor necesitades novas ideas e propostas... pois aquí van algunhas:

 - "Rutinas de exercicios para superheroes": desfruta de rutinas de exercicios guiadas polos teus superheroes e personaxes de ficción favoritos: Batman, Black Panther, Stra Wars... aquí tes un exemplo:

- "EduClan - Educación Física": Tódolos días á maña en ClanTV emítese, a partir das 9:50 h o programa "Nos movemos" orientado a nenos de Primaria. Neste programa, coñecidos deportistas españois, seguindo propostas de mestres de EF, explican e realizan diversos xogos para manterse activos. Se non podedes velo en directo, os programas están dispoñibles na páxina web de ClanTV.

- "Uno para ganar": Trátase de probas de habilidade, coordinación, equilibrio e axilidade que formaban parte dun concurso emitido en TV fai xa varios anos. Os concursantes tiñan un minuto para realizar as probas como podedes ver neste vídeo. O documento PDF que tedes enlazado no título é unha recopilación dalgúns destes xogos realizada polo mestre de EF Jose Luis Lara Olmedo. Pode ser unha boa opción para pasar un tempo entretidos en familia.

AnxOca para xogar en familia

Qué tal familias? Empezamos o terceiro trimestre e esperamos que todos sigades o mellor posible. Déixovos un novo recurso para xogar en familia. Neste caso adaptei a idea doutros mestres de EF e elaborei o que poderíamos chamar unha Oca Saudable, a AnxOca. A dinámica do xogo e idéntica á do xogo tradicional tendo en conta as instrucións que se describen para as casas (casillas) especiais. Só tedes que imprimir ou copiar o taboleiro, buscar fichas e dado e a xogar!
Coas casas especiais búscase traballar distintos contidos propios do área de EF: condición física, alimentación saudable, expresión corporal e ritmo. Todo isto de forma lúdica e sobre todo en familia.
Espero que o desfrutedes.

AnxOca by Gerar Parrado on Scribd

O Anxo móvese na casa!

E tanto que se move! O prometido é débeda e grazas a colaboración dunha boa parte do alumnado e familias aquí temos a montaxe na que demostrades que os nenos e nenas do Anxo seguen a manterse en forma na casa. Espero que a desfrutedes e que teñades, dentro do posible, unhas boas "vacacións" de Semana Santa. Á volta propoñeremos novas ideas relacionadas coa actividade física e hábitos saudables. Moito ánimo e xa queda menos!

Novas opcións para a vosa rutina

Entramos na segunda semana de "permanencia na casa" e por se algún dos que estades a seguir unha rutina de exericios (espero que sexades a maioría) queredes engadir novas actividades deixovos a continuación un novo vídeo.
Os primeiros exercicios que aparecen "simulan" saltos de comba que aprendimos no 1º trimestre (sobre todo de 3º a 6º de Primaria), se tedes a sorte de ter corda na casa, espazo suficiente e, or suposto, vos dan permiso, podedes probar a facelos coa comba. A continuación móstranse exercicios de coordinación sinxelos. Por último veredes exercicios que son variantes máis "esixentes" dalgúns que aparecen no primeiro vídeo.
Podedes continuar coa primeira rutina, cambiala por ésta, unir as dúas ou mezclar exercicios. Sempre intentando facer 3 roldas de 5-8 exercicios sen descanso e parando 2-3 minutos entre cada rolda.
Recordade, sobre todo os máis maiores, facer mobilidade articular antes de comezar (nocellos, xeonllos, cadeiras, ombros e pescozo) e estiramentos dos músculos máis empregados durante o exercicios ao rematar (xemelgos, cuádriceps, isquitibiais, tríceps, deltoides). Se tedes algunha dúbida podedes deixala por escrito nos comentarios a esta entrada e tentarei responder o máis rápido posible.
Nos próximos días aparecerán novas propostas de retos e actividades relacionadas con hábitos saudables. Un saludo e moito ánimo para todos e todas!

Outras opcións para estar activos na casa

Aquí van outras opcións para manterse activos durante estes días na casa:

Se vos gusta o BAILE:

- Vídeos en Youtube de Just Dance ou Dance Central. Existen de todo tipo de cancións e niveis de dificultade.
- Vídeos de Zumba Kids (adaptados aos máis péquenos e asequibles para toda a familia).

Para RELAXARSE e traballar a vosa FLEXIBILIDADE:

- Cosmic Kid Yoga: contos e historias para os máis pequenos nas que hai que adoptar distintas posturas de ioga a medida que avanza a historia. Está en inglés pero ten a posibilidade dentro das opcións de Youtube de subtítulos en castelán.
- Smile and Learn: Este canal educativo, entre outras moitas opcións, ofrece a posibilidade de aprender distintas poses do Ioga basadas en diferentes animais. Os nenos de Infantil e de 1º a 4º de Primaria, poden conocer xa algunha porque ás veces realizámolas ao remate das sesións de EF.
- Sesión de Ioga para nenos: Entretido vídeo de 8 minutos de duración que permite realizar una sinxela e divertida sesión de ioga.

Outros XOGOS máis TRADICIONAIS:

- Xogo de puntería caseiro: elabora o teu propio material para este xogo de puntería.
- Xogar ao escondite, "sillas musicais", saltar á comba se hai espazo suficiente, xogar á goma (recordando e rescantando cancións da nosa infancia), carreiras de chapas ou "fútbol chapa", crear e realizar un pequeno circuíto de obstáculos coas cousas que teñamos na casa (cadeiras, cordas, mesas pequenas, coxíns...), xogar a "Paloma blanca, Paloma negra", xogar á "Pita cega" ("gallinita ciega")... en fin calquera tipo de xogo que se poida adaptar a estas circunstancias.
- Xogos con globos: intentar que non caia ao chan entre dúas ou máis persoas, golpear únicamente con certas partesdo corpo (mans, pés, testa...), xogar un partido de "voleibol"...
- Creade os vosos propios "zancos" para xogar e mellorar o voso equilibrio (para os máis pequenos).
- Elaborar bolas de malabares e practicar moitísimo.

Se queredes seguir MANTENDO A FORMA con outras rutinas de exercicios;

- Descargarse e empregar no voso móbil ou tablet a app SWORKIT. Inclúe unha ampla variadade de rutinas de exercicios de distinto tipo e para distintas partes do corpo e unha das súas opcións é ENTRENAMIENTO PARA NIÑOS.

Ánimo e probade as opcións que máis vos gusten.

Algunhas destas recomendacións están sacadas  do blogue http://coneftadosconalvaro.blogspot.com/ 

O Anxo mantense en forma!

Ola familias! Esperamos que na medida do posible a saúde estéavos a acompañar e que levedes a situación de illamento creada polo Estado de Alarma do mellor xeito posible. Como probablemente xa teredes lido en redes sociais ou medios de comunicación, un aspecto importante para afrontar esta situación tan excepcional e crear unha serie de rutinas diarias, especialmente no caso das familias con fillos menores. Dentro das mesmas, que poden incluír as tarefas escolares, tarefas do fogar, ocio... cremos importante engadir un tempo diario adicado ao exercicio físico tendo en conta os beneficios que o mesmo aporta a nivel físico e mental .

Resulta difícil debido á situación dada pero desde o área de EF queremos propoñervos un pequeno reto ou desafío físico en familia. Trátase de completar unha rutina diaria dos exercicios que se amosan no seguinte vídeo e que poden ser realizados nun espacio pequeno sen ningún material adicional, só co voso corpo. Algúns deles soemos facelos nas clases de EF como parte do quecemento polo que os nenos/as (especialmente de 3º a 6º) xa deberían de coñecelos.

Pois ben, o reto consiste en completar cada día 3 roldas de todos estes exercicios atendendo á orde e ao tempo de execución ou repeticións que se indican no vídeo e descansando 2-3 minutos entre cada rolda de exercicios.
Para rexistrar que ides cumprindo o reto, debedes de completar a ficha que se achega a continuación en PDF (podedes imprimila ou copiala a man). Ademais, como dixemos, este reto debedes intentar que sexa en familia, polo que se conseguides que algún familiar se una a vos na execución do mesmo deixádeo rexistrado nesta folla.

Folla Rexistro Reto Familiar by Gerar Parrado on Scribd

Por último, se vos apetece podedes gravarvos co móbil(máximo 10 segundos e en sentido horizontal) mentres realizades esta rutina e envialo á conta de correo que vos facilitamos a través de Abalar. Se temos suficientes vídeos, faremos unha pequena montaxe para demostrar que o Anxo quere manterse en forma tamén fóra do cole. Se tedes algunha dúbida podedes expresala facendo un comentario a esta entrada.
Ao longo destes días propoñeremos outras opcións para manterse en forma na casa. Moito ánimo!